Ƀơi mông tŭ jum, Khua dêh čar ơi Phạm Minh Chính pơdah pran jua đing nao biă mă hăng kah pơpha tơlơi pơhing hlăk rung răng ƀơi kual Tong wing ră anai; kiăng hrŏm hăng dêh čar Qatar djru pơsir, ĕp hơdră ngă hơđong amăng kual Trung Đông.

Khua dêh čar brơi thâo, hơmâo bơkơtuai laih hăng khua dêh čar, khua ding jum pơtom hiăp dêh čar Qatar, Việt Nam kah pơpha tơlơi tơnap hăng hơdôm dêh čar amăng kual Tong wing, laih anun tŭ ư hăng Hră pơtrun mơ̆ng Sang gum hơbit djop dêh čar brơi pơdơi mơtam blah ngă, kơsung nao ƀơi hơdôm dêh čar; lăi anăm kơsung blah pơnah đam nao pơ anih ană plơi pla dŏ ôh. Khua dêh čar ăt lăi Việt Nam lĕ dêh čar tŭ laih tơlơi răm ƀăm rơnuk blah wang ngă sui thun, arăng kom rô nao rai hăng gơyut gơyâo jar kmar, yua kơ anun thâo hluh tong ten biă mă, rơnoh yom mơ̆ng tơlơi rơnuk rơnua hơđong; čang rơmang hơdôm bơnah khom ĕp hơdră pơsir hăng tơlơi rơnuk rơnua, pơđut tañ blah ngă.

Khua dêh čar, ơi Phạm Minh Chính čang rơmang tañ pơđut tơlơi blah ngă, pioh kơ hơdôm sang măi ƀơi Qatar tañ rŭ pơdong glăi, mă ia jâo pioh sĭ mơdrô. Khua dêh čar ta, ăt čang rơmang hăng tơlơi thâo thăi, găn rơgao mơ̆ng Qatar, djru ba, tuh pơ alin ƀơi Việt Nam man pơdong lu hơjai răk pioh ia jâo, ngă sang măi pơkra ayuh gaih hăng ba hyu sĭ mơdrô amăng kual.