Dong mơng akŏ thun 2023 truh ră anai đơ đam dêh čar ƀuh giăm 3 rơbâo wŏt apui ƀong hăng tơlơi bơdjơ̆ nao apui ƀong, ngă 134 čô mơnuih djuai, 101 čô mơnuih rơka rơkač, kông ngăn, gơnam tam răm rai truh pơ giăm 230 klai prăk. Pơđut mông jơnum, Khua dêh čar ơi Phạm Minh Chính lăng yôm hơdôm tơlơi gir run, boh than mơ̆ djop ding jum, gơnong bruă, ƀon lan, hơdôm anom bruă bơdjơ̆ nao dưi ngă amăng pơgang apui ƀong hăng mă mơnuih bưp tơlơi truh sat amăng thun blan laih rơgao, hơmâo pơgôp ba glăi tơlơi hơdip rơnuk rơnua, hơđong amăng mơnuih mơnam.

Hrŏm hăng anun, Khua dêh čar rơkâo kiăng khut khăt lăng glăi bruă pơgang apui ƀong hăng djru brơi mơnuih, ăt dŏ lu anŏ aka ƀu klă, kiăng  tañ, khut khăt pơsir hĭ. Khua dêh čar lăi rơđah, bruă git gai ngă tui amăng pơgang apui ƀong hăng djru mă mơnuih ƀơi sa, dua boh anih aka ƀu klă đơi ôh. Khua dêh čar rơkâo ƀing khua ding jum, anom bruă bơkơnar Ding jum, khua Jơnum min mơnuih ƀôn sang hơdôm boh tơring čar, ƀon prong lăng glăi tong ten, pơplih pơkra amăng bruă git gai pơgang apui ƀong hăng djru mă mơnuih.