Khua dêh čar ta lăi, kiăng anom bơwih ƀong kơnuk kơna jing “ngăn drăp yôm mơ̆ng tơlơi bơwih ƀong kơnuk kơna” ba jơlan tơlơi bơwih ƀong pơkŏn, kiăng lăng glăi tơlơi hơget ngă gun amăng jơlan hơdră bơwih ƀong hăng kual  bơwih ƀong anai. Khua dêh čar kiăng ƀing khua pơƀut bơkơtuai, pơtŏng glăi tơlơi gơgrong bruă mơ̆ng Anom bơwih ƀong kơnuk kơna ră anai, mơ̆ng anun ngă rơđah tơlơi kiăng dưm dăp, pơplih kual anom bơwih ƀong kơnuk kơna lăp djơ̆ hăng tơlơi hơmâo sit nik mơ̆ng Việt Nam.

Anai ăt jing bruă bơwih brơi kơ bruă tum pơƀut, pơtŏng glăi abih bang bruă ngă tui Tơlơi pơsit mrô 12-NQ/TW kơ pơplih phrâo hăng pơđĭ tui anŏ klă mơ̆ng anom bơwih ƀong kơnuk kơna či lăi pơthâo hăng Ding jum kơđi čar sem lăng, pơdah pơthâo pơ Khul khua gum bruă git gai Ping gah tal 13. Kiăng pơtŏng glăi rơđah hloh kơ bruă tuh pơ alin, tŭ yua bruă tuh pơ alin mơ̆ng anom bơwih ƀong amăng hrơi blan rơgao, mơ̆ng anun thâo hơdôm tơlơi gun, tơlơi tơnap kiăng pơsir brơi.