Tlam lơ 23/12, ƀơi Ƀirô Kơnuk kơna, Khua dêh čar ơi Phạm Minh Chính git gai jơnum khul apăn bruă kơnuk kơna pơgôp hiăp kơ bruă pel ĕp, pơsir hĭ tơnap tap brơi hơdôm akŏ bruă man pơkra jơlan rơdêh treng phun. Anai lĕ hơdôm ară jơlan rơdêh treng Lào Cai-Hà Nội-Hải Phòng, jơlan rơdêh treng đuăi hmar Kơdư-Dơnung hăng hơdôm ară jơlan rơdêh treng ƀơi Hà Nội, Hồ Chí Minh. Đĭ pơhiăp pơđut mông jơnum, Khua dêh čar tŭ yap djop ding jum, gơnong bruă, ƀon lan hơmâo gir run gum hrŏm, pok pơhai lu bruă akŏ phun amăng thun 2025, sit biă ñu lĕ bruă čih pơkra glăi tơlơi phiăn jơlan rơdêh treng, pơgiong tơhnal pơkă, hơdră bruă kiăng pơtrut pok pơhai ngă hơdôm akŏ bruă.

Khua dêh čar rơkâo Ding jum boh thâo ia rơgơi, Ding jum man pơdong pel ĕp glăi hơnong pơkă jar kmar, ruah bruă dưm truă măi mok lăp djơ̆ hăng jơlan rơdêh treng đuăi hmar, pơhlôm klă amăng yua măi mok, bơwih ƀong huă, pơtom hiăp. Hăng jơlan rơdêh treng Lào Cai-Hà Nội-Hải Phòng, rơkâo ngă djơ̆ hrơi blan, gir run pơgiong bruă blung a kaih hloh blan 3/2026; laih dong pơtrut tañ bruă man pơkra jơlan mur amăng ƀôn prong Hà Nội, Hồ Chí Minh.