Khua dêh čar lăi, amăng thun 2025, Kơnuk kơna hăng khua dêh čar hơmâo pơčrâo bruă, git gai khut khăt pơđĭ kyar sang dŏ, biă mă ñu pơdong sang sĭ nua rơgêh djru ba mơnuih tơnap tap dưi blơi, hơmâo ngă pơgiong abih bang 102 rơbâo boh sang, laih dơ̆ng hlăk anăp nao tơhnal pơkă ngă giong tañ 1 klăk boh sang djru mơnuih mơnam tơnap tap amăng thun 2028.

Hrŏm hăng anun, bruă lui sang tơ̆i, sang phŏ kơ mơnuih ƀôn sang ƀun ƀu hơmâo sang dŏ, sang anŏ kơnuk kơna djru ba, hơmâo ngă giong tañ hloh 5 thun 4 blan tui hăng tơhnal pơkă; Bruă mă Quang Trung hlăk ming pơkra glăi, pơdong sang phrâo kơ mơnuih ƀôn sang bơbeč djơ̆ tơlơi răm ƀăm lŏn adai ngă ăt dŏ ngă hmar. Ƀơi mông jơnum, Khua dêh čar pơtrun hiăp lăi pơtong tơlơi pơhing man pơdong sang dŏ hăng anih anom sĭ mơdrô lŏn mơnai, pưk sang gơnam ƀu thâo pŭ hyu truh abih 3 blan tal IV thun 2025, tơlơi pơhing brơi čan prăk sĭ mơdrô lŏn mơnai, pưk sang, laih dơ̆ng rơkâo đĭ rơnoh pơkă man pơdong sang pioh sĭ rơgêh djru mơnuih tơnap tap mơ̆ng thun 2026 hăng hơdôm thun tŏ tui, kiăng ngă djơ̆ tui tơlơi dưi jao laih anun pơtrut kơtang pơblih hơdră ngă hră pơar amăng kơnuk kơna.