Lăi pơthâo glăi mông jơnum, khua pơ ala Ding jum bruă hmua hăng ayuh hyiăng brơi thâo amăng rơwang hrơi tơjuh rơgao, hơmâo pơtrun bruă hơduah ĕp, pơphun brơi ƀing khua nao mă bruă pơ hơdôm boh tơring; blung a ƀuh, pơplih glăi hơdôm hră pơ-ar “pơdơi bơtơhmal” aka ƀu pơhlom tơlơi phiăn, kiăng lăng glăi, pơsir hĭ tui tơlơi phiăn. Kơ bruă wai lăng grup ƀat tô: 100% ƀat tô mă akan (rơbêh 80 rơbâo boh ƀat tô) hơmâo čih anăn, wai pơgang tui bruă nao rai pơ tơdrun ia rơsĭ. Bruă pôr pơhing kơ bruă gir pơgăn mă akan IUU mơ̆ng Việt Nam hơmâo pơtrut tui.

Klah čun glăi mông jơnum, Khua dêh čar bơni kơ tơlơi gir mơ̆ng ding jum, anom bruă khut khăt pok pơhai ngă bruă na nao, bơbruai, ƀrô đĭ kyar bruă bơwih ƀong akan hơdang hơđong, ƀrô pơgăn mă akan IUU. Khua dêh čar ta brơi thâo, him lăng Grup pel ĕp kơđi EC amra ngă bruă ƀơi Việt Nam amăng blan 3 anai, anai jing tal pel ĕp tal 5. Khua dêh čar lăi dlăm: Bruă kiăng ngă kơtang hloh lĕ pơhlom đĭ kyar hơđong bruă bơwih ƀong mơ̆ng akan hơdang mơ̆ng dêh čar Việt Nam tui hăng tơlơi đĭ kyar hrŏm anun lĕ đĭ dua mrô, laih dong kiăng lui kak kơñĭ jing hră bơtơhmal mơ̆ng IUU tui hăng tơlơi kiăng ngă mơ̆ng EC. Anai jing tơlơi đĭ kyar tañ, hơđong mơ̆ng lŏn ia, ăt jing tơlơi kơdrưh mơ̆ng lŏn ia ta, mơ̆ng djuai ania ta, ƀrô bơwih brơi tơlơi găl mơ̆ng mơnuih ƀôn sang./.