Tlam lơ 01/10, Khua dêh čar ơi Phạm Minh Chính git gai jơnum kơnuk kơna pioh pơtong glăi glăi bruă ngă tui, jŭ yap glăi, pơčrong sai hơdră pơsir tơlơi tơnap tap, gun gan amăng bruă mă gong gai kơnuk kơna dua gưl ƀơi tơring čar. Klah čun glăi amăng mông jơnum, Khua dêh čar ơi Phạm Minh Chính lăi pơtong, ăt khom ngă tui khut khăt, sa amăng plĕ hăng tŭ yua hloh; tañ pơsir hĭ hơdôm tơlơi ƀu gêh găl ră anai; gong gai kơnuk kơna ƀơi tơring čar 2 gưl pơphun mă bruă sa hơnơ̆ng tŭ ư hrŏm, ngă bruă hruaih, hlom bom, djơ̆ hăng tơlơi či kiăng mơ̆ng Ping gah, kơnuk kơna laih anun mơnuih ƀôn sang.

Khua dêh čar brơi thâo lĕ, glông bruă čar phrâo khom ngă bruă tŏu hloh kơ glông bruă hơđăp; bruă pơsir hră pơar kơ mơnuih ƀôn sang, kơ sang bruă mơdrô jai hrơi klă hloh, boh nik ñu amăng bruă wai lăng gah lŏn mơnai, pơkă hơnơ̆ng pơdong plơi, sang dŏ, wai lăng kông ngăn prăk kăk, man pơdong sang bruă, čuk jơlan, bruă ia jrao, bruă pơtô hrăm….; ngă pơgiong mrô rơnoh djă pioh hăng pơtruh nao rai, pơmut hrŏm tơlơi pơhing djop sang bruă pioh pơsir bruă ngă hră pơar kơnuk kơna djop ding jum, anom bruă gơnong dlông hăng tơring čar. Ƀơi mông jơnum, Khua dêh čar pơčrâo rơđah, ră anai dŏ 31 rơbâo čô mơnuih rơkâo pơdơi bruă aka ƀu tla prăk djru tui tơlơi pơtrun; khom ngă rơđah yua hơgĕt dŏ kaih, laih anun pơhŭi hlâo anom bruă pơpă hơmâo prăk laih, hơmâo hră pơtrun giong laih mơ̆ aka ƀu tla prăk kơ ƀing pơdơi bruă anun. Khua dêh čar rơkâo khom ngă giong bruă tla prăk kơ ƀing pơdơi bruă djơ̆ tơlơi phiăn pơkă, hlâo kơ lơ 10/10/2025.