Ƀơi mông bưp, Khua dêh čar ơi Phạm Minh Chính đăo kơnang tal rai čuă jơmư anai, rai mă bruă ƀơi Hà Nội hăng hơdôm tơring čar ƀrô djơ̆ tal Hơdor glăi hrơi pơklaih rơngai plơi prong jưh jom Hà Nội lơ 10/10, amra pơtrut tui bruă ngă giăng mah ƀŭ ƀăn, hiam klă, djơ̆ lăp hăng hin biă mă hơmâo ƀơi rŏng lŏn tơnah kah hăng Việt Nam-Lao, ăt kah hăng tơlơi ngă giăng mah gru grua, lir hơbit tong ten, jĕ giăm biă mă plah wah Hà Nội hăng plơi prong jưh jom Vientiane.

Khua dêh čar lăi pơtong Ping gah, Kơnuk kơna Việt Nam lăng yôm pioh sa tơlơi đing hlâo hloh kơ bruă pơđĭ kyar bruă ngă giăng mah pŭ ƀăn dua bơnah plơi prong jưh jom Hà Nội hăng Vientiane, kiăng pơđĭ tui anŏ gơgrong ba ba jơlan ngă hrŏm dua bơnah dêh čar. Khua dêh čar rơkâo dua bơnah plơi prong jưh jom ăt kah hăng hơdôm tơring čar đing nao kơ bruă čuk pơkra jơlan rơdêh đuăi hmar pơtruh nao rai dua bơnah Hà Nội hăng Vientiane, kiăng pơtrut bơwih ƀong huă, rô nao rai amuñ hloh wơ̆t hăng bruă pơkra jơlan rơdêh treng, pơtruh nao rai truh pơ tơdrun kompan.