Ƀơi mông jơnum, Khul hơmâo pơphun brơi jŭ yap glăi abih bang bruă mă, prăp lui Jơnum prong ruah khua khul wai lăng bruă bơkơtưn khăp kơ lŏn ia tal XI pơphun amăng lơ 26-27/12; laih dơ̆ng sem lăng brơi jơlan hơdră sem lăng apah bơni pơ anăn “Ling tơhan blah ngă khin hơtai mơnuih ƀôn sang”, “Mơnuih khin hơtai mă bruă” brơi kơ khul grup sang bruă, mơnuih ba gru hlâo bơkơtưn mă bruă khăp kơ lŏn ia.

Jơnum ruah khua Khul bơkơtưn khăp kơ lŏn ia đơ đam dêh čar jing sa bruă mă kơđi čar yom biă mă, lu tơlơi aka ƀu hơmâo phara ôh. Jơnum anai jing mông pơtum, ngă bang tui pran jua khăp kơ lŏn ia, tơlơi pơmin gir run hrưn đĭ, čang rơmang pơyơr pran jua kơ djuai ania, pok jơlan phrâo amăng bruă bơkơtưn nao rai, ba lŏn ia ta kiăng pơdrong sah, pơđĭ kyar hmư̆ hing, thâo rơgơi, hyuk hyam mơak klă. Pơhiăp klah čun amăng mông jơnum, Khua dêh čar ơi  Phạm Minh Chính bơni hơdôm khul grup hơmâo  pơtum git gai ngă klă bruă jao prăp lui jơnum prong ruah khua khul bơkơtưn khăp kơ lŏn ia. Khua dêh čar pơtă pơtăn, ră anai bruă pok pơhai lăi pơthâo boh tơhnal tŭ mă amăng tơlơi bơwih ƀong huă-mơnuih mơnam ƀơi lŏn ia tơdơi kơ 40 thun pơblih phrâo; pơdă rup pơƀuh kơ tơlơi pơblih phrâo lăi nao anăn “Bơkơtưn khăp kơ lŏn ia-yua sa boh lŏn ia Việt Nam khin hơtai kơjăp kơtang”. Hrŏm hăng anun, pơphun pôr tơlơi pơhing bơkơtưn mă bruă khăp kơ lŏn ia pơtruh brơi kơ abih bang mơnuih mơnam, pơtrut pran jua, ba tơlơi hur har pơđĭ kyar lŏn ia amăng hơdôm thun tŏ tui pơ anăp adih.