Jơnum pơdă lăi pơthâo gơnam mơdrô Bơyan mơyan tal I thun 2025 dưi pơphun prong biă mă mơ̆ng hlâo truh ră anai aka ƀu hơmâo djơ̆ ôh ƀơi Việt Nam, pơtum truh 2.500 sang bruă mơdrô, pơkra ming gơnam tam, sang bruă amăng dêh čar hăng mơ̆ng tač rơngiao rai pơdă hrŏm. Hăng akŏ tơlơi jơnum “Pơtruh nao rai Ană mơnuih hăng Bruă pơkra ming, Sĭ mơdrô”, bruă mă pơbưp nao rai sĭ mơdrô pơphun dik dăk; hơdôm rơbâo wơ̆t jơnum pơčrong sai ngă hrŏm sĭ mơdrô, kĭ hră pơkôl ngă hrŏm, blơi gơnam sĭ mơdrô, kĭ hră pơkôl tuh pơ alin, jao glăi boh thâo ia rơgơi plah wah hơdôm sang bruă mơdrô amăng dêh čar laih anun sang bruă mơdrô mơ̆ng Việt Nam hăng jar kmar, rơnoh prăk tuh pơ alin tui hăng hră kĭ pơkôl amăng tal anai truh 5000 klai.

Jơnum pơdă gơnam sĭ mơdrô anai ăt jing mông jơnum mơak kơ khul pơčeh phrâo ia rơgơi hăng gru grua hiam adoh suang, anih lăi pơtong rơnoh yom phun: “Pơđĭ kyar bơwih ƀong huă khom nao hrŏm pơđĭ kyar gru grua hiam, mơnuih mơnam hăng ană mơnuih”. Pơhiăp ƀơi mông jơnum pơđut tal pơdă sang čơ, Khua dêh čar ơi Phạm Minh Chính lăi pơtong, Jơnum pơdă sang čơ anai lĕ plang pơtruh brơi tơlơi pơhing tŭ yua pơtrut sĭ mơdrô, blơi gơnam yua amăng dêh čar ta pô-sa pran pơtrut kơtang bruă pơkra ming hăng sĭ mơdrô, blơi pơmut sa amăng hơdôm hơdră ngă hiam phrâo “jing pran kơtang pơtrut rơnoh pơđĭ kyar gru grua amăng bruă mă”-sa bruă pơtruh nao rai beč bal, lir hơbit bruă sĭ mơdrô hăng jar kmar, ngă atur pơđĭ kyar anih anom sĭ mơdrô amăng dêh čar rơnuk hrưn đĭ phrâo ba yua mrô. Khua dêh čar ăt bơni kơ lu mơnuih hơmâo pran jua čơmah, kah pơpha djru ba hăng mơnuih ƀôn sang kual ia ling dăo ngă, kơnang kơ jơlan hơdră “Bơyan mơyan čang rơmang”, hăng rơnoh prăk hơmâo truh 316 klai. Khua dêh čar lăi pơtong, pran jua thâo khăp pap anai yom biă mă pơdah rai gru grua hiam mơ̆ng djuai ania, tơlơi khăp djuai ania, tơlơi hơdor tơngia mơnuih ƀôn sang mơ̆ng djuai ania dêh čar ta, jing atur hăng pran jua kơtang amăng lăm pioh lŏn ia ta yak nao kơjăp pơ ataih adih, ƀơi jơlan hlăk pơđĭ kyar.