Ƀơi mông bưp, dua čô khua tŭ ư hăng tơlơi ngă hrŏm rơbêh 75 thun rơgao, dua bơnah kiăng ngă hrŏm kjăp hloh amăng djŏp bruă, kiăng pơtrut tui tơlơi rô nao rai dua bơnah jai hrơi yôm hloh amăng hrơi blan pơ anăp. Kơ bruă bơwih ƀong - sĭ mơdrô - tuh pơ alin, dua čô Khua dêh čar pơsit anai lĕ gong tơmeh phun amăng tơlơi ngă hrŏm dua bơnah; pơtrut tui tơlơi ngă hrŏm bơwih ƀong - sĭ mơdrô hăng tuh pơ alin lăp djơ̆ hăng tơlơi ngă hrŏm kơđi čar; pơtrut tui hloh hơdôm tơlơi ngă hrŏm glăk hơmâo. Khua dêh čar Phạm Minh Chính pơsit Việt Nam amra gơgrong bruă pok pơhư brơi kiăng hơdôm mơta gơnam mơ̆ng Romania dưi mut amăng dêh čar Việt Nam hăng ASEAN. Dua bơnah tŭ ư ngă hrŏm tŭ yua hloh amăng bruă hơmâo hơđăp kah hăng pơtô pơjuăt, măi mok ia rơgơi, rơnuk rơua - pơgang lŏn ia, gru grua bơkơjăp drơi jăn hăng tuai čuă ngui, mă bruă, ia jrao laih dong pok prong ngă hrŏm amăng bruă phrâo kah hăng măi mok pôr pơhing, pơčeh phrâo, pơplih yua mrô, pơplih mơtah, bơwih ƀong lok nao rai kjăp....

Tơdơi kơ mông bưp, dua čô Khua dêh čar hơmâo ƀuh ƀơi anăp Tơlơi kĭ pơkôl 19 pok hră ngă hrŏm kơplah wah hơdôm ding jum, anom bruă, tơring čar ƀôn prong dua bơnah amăng bruă bơwih ƀong, gru grua, mơnuih mă bruă hăng pơtô pơjuăt.