Amăng mơguah lơ 8/11, ƀơi sang jơnum prong Rơnuk rơnua či plơi prong jưh jom Phnom Penh, Khua dêh čar Kur, ơi Samdech Techo Hun Sen git gai ngă lơphet tŭ jum khua dêh čar ta ơi Phạm Minh Chính hăng Grup khua mua kơnuk kơna Việt Nam čuă jơmư sit nik dêh čar Kur. Tơdơi kơ jơnum tŭ jum, dua čô khua pơphun bơkơtuai sit nik. Hlâo kơ anun, tơdơi kơ truh pơ dêh čar Kur, ơi Phạm Minh Chính Khua dêh čar nao dưm guang bơnga ƀơi Gong kut rơngai, rup trah rơgom pơtao dêh čar Kur ơi Norodom Sihanuk, gong kut ngă giăng mah Việt Nam-Kur ƀơi plơi prong jưh jom Phnom Penh.

Amăng tal nao čuă sit nik dêh čar Kur, tơdơi kơ Khua dêh čar ơi Phạm Minh Chính bơkơtuai hăng khua dêh čar Kur; Khua dêh čar ơi Phạm Minh Chính amra nao bưp pơtao dêh čar Kur, ơi Norodom Sihamoni; bưp Khua gơnong dlông pơ ala mơnuih ƀôn sang Kur, ơi Say Chhum; khua pơ ala mơnuih ƀôn sang dêh čar, ơi Heng Samrin. Tal nao čuă jơmư anai amăng thun ngă giăng mah Việt Nam-Kur 2022 djru pơtrut tơlơi ngă giăng mah dêh čar jĕ giăm ieo gah hiam klă, kjăp gru grua, ngă hrom hlom bom, hơđong kjăp sui thun kơ dua bơnah.