Mơguah lơ 20/10, amăng jơnum lok 10, Khua pơ ala mơnuih ƀôn sang dêh čar tal XV, Khua dêh čar ơi Phạm Minh Chính hơmâo pơđok hră lăi pơthâo kơ boh than ngă tui akŏ bruă pơđĭ kyar bơwih ƀong huă-mơnuih mơnam thun 2025, rơwang thun 2021-2025 hăng akŏ bruă amra ngă thun 2026. Khua dêh čar lăi pơtong, rơwang ngă bruă rơgao lĕ thun blan ngă bruă pơdah pran gir run, khin hơtai kjăp phik, thâo pơčeh phrâo hăng hrưn đĭ yua kơ lŏn ia, yua kơ mơnuih ƀôn sang. Việt Nam hơmâo wai pơgang kjăp klin Covid-19, tañ pok glăi hơkrŭ tơlơi bơwih ƀong huă, hơmâo jar kmar lăng yôm.

Amăng hrơi blan hơmâo tơnap tap amăng rŏng lŏn tơnah, tơlơi bơwih ƀong huă ƀơi Việt Nam ăt tŏ tui pơđĭ kyar, dong amăng grup hơdôm boh dêh čar ba jơlan hlâo amăng rŏng lŏn tơnah. Him lăng GDP thun 2025 đĭ rơbêh 8%; đĭ ƀiă rơwang thun 2021-2025 lĕ 6,3%. Pok prong bơwih ƀong mơng 346 klai đôlar Mi thun 2020 đĭ 510 klai đôlar Mi thun 2025, đĭ 5 gưl, dong amăng 32 boh dêh čar rŏng lŏn tơnah; GDP rĭm akŏ mơnuih giăm 5.000 đô lar Mi, giăm 1,4 wŏt pơhmu hăng thun 2020.