VOV4.Jarai-Lơ 18/9, Khua dêh čar ơi Phạm Minh Chính hăng grup hyu mă bruă hơmâo nao sem lăng anih mă bruă, pel ĕp pơtrut man pơdong 3 boh sang ia jrao prong amăng tơring čar Hà Nam hơmâo sang ia jrao tal dua anăn  Lão Khoa, pioh pơjrao ƀing tha rơma, sa boh sang ia jrao tal dua sang ia jrao  prong Việt Đức hăng sang tal dua sang ia jrao prong Bạch Mai. Hơdôm boh sang ia jrao tal dua anai, hơmâo Ding jum ia jrao pơsit mơ̆ng thun 2014, pơphun man pơdong mơ̆ng thun 2015, pơmin ngă giong thun 2017, samơ̆ truh ră anai aka ƀu mă bruă lơi.

Khua dêh čar pơtrun hiăp kơ Ding jum ia jrao hăng djop ding jum, anom bruă pơtong rơđah anŏ gun, boh nik ñu tơlơi soh glăi mơ̆ng bruă čih pơkra hơdră, pơtô brơi kač rup man pơdong, pơtong glăi sit nik truh ngă hră apah prăk tuh pơ alin, man pơdong…..biă mă ñu pơtong glăi phun ñu ba truh hăng tơlơi glam ba ngă kaih anun, tơlơi gun pơpă. Tui hăng Khua dêh čar lăi, bruă tuh pơ alin man pơdong sang ia jrao kaih rơgao hơdôm thun, prăk đĭ tui rơnoh dua klâo wơ̆t. Phun ñu mơ̆ng hơmâo tơlơi kơƀah tơdu, soh glăi bruă čih pơkra, pơčrâo bruă, pơsit tuh pơ alin, ruah pô man pơdong, ngă hră apah prăk pơjao bruă truh kơ pok pơhai mă bruă.

Khua dêh čar ơi Phạm Minh Chính pơtrun hiăp brơi grup mă bruă yua kơ Khua ding jum ia jrao ngă khua grup, hơmâo khua mua hơdôm ding jum Akŏ bruă man pơphô hăng tuh pơ alin, Ding jum Man pơdong, Prăk kăk, Tơlơi phiăn hăng Jơnum min mơnuih ƀôn sang tơring čar Hà Nam pơphun mơtam bruă mă, hyu ĕp glăi hră pơar ngă djơ̆ tơlơi phiăn mơ̆n hă, rơnoh tuh pơ alin, thun blan mă bruă hăng  pơsir hơdôm tơlơi tơnap tap.

Nay Jek: Pơblang