Khua dêh čar pơtă Ping gah tơring čar Thanh Hóa kiăng kiăo tui lăng tơlơi sit nik, ngă kiăo tui hơdôm tơlơi črâo trun, tơlơi pơmĭn, tơlơi git gai mơng Ping gah; kiăng khĭn hơtai, anăm pơtah hơtai lơm glăk gêh gal, samơ̆ anăm hŭi ƀơi anăp kơ tơlơi tơnap tap. Hluh rơđah kơ tơlơi pơsit “mơnuih ƀôn sang lĕ phun” amăng djop mơta bruă; kiăng đing tơngia hmư̆ mơnuih ƀôn sang, ngă bruă yua mơnuih ƀôn sang, kiăng pơhlôm djop hơdră bruă anăp nao mơnuih ƀôn sang.

Amăng pơđĭ kyar bơwih ƀong huă, kiăng đing nao pơplih kơtang 4 anih pơtrut phun hơmâo Nghi Sơn, Sầm Sơn, Bỉm Sơn hăng Lam Sơn; pơjing hơdră bruă pơjing hơdôm kual anai jing anih ba jơlan hlâo amăng bơwih ƀong huă ƀơi tơring čar. Khua dêh čar lăi pơtong bruă jao pok pơhai rơwang tal 2 grup hlong ia jâo Nghi Sơn, pơđĭ kyar tơdrun kompăn Nghi Sơn jing tơdrun kompăn dêh čar, anom bruă logistics kual hăng sa amăng hơdôm tơdrun kompăn jar kmar pơprong ƀơi kual Kơdư, ngă atur kiăng Thanh Hoá pơtrut tañ amăng rơwang phrâo.