Hră lăi pơthâo ƀơi mông jơnum brơi ƀuh, 4 blan akŏ thun 2026, tơlơi bơwih ƀong huă ƀơi dêh čar ăt hơđong mơ̆n, rơnoh prăk trun nua dưi pơhlom, anŏ pơkă bơkơnar, rơn oh pơhrui glăi prăk kông ngăn kơnuk kơna hơmâo rơbêh 1,11 klăk klai prăk, prăk blơi pơmut gơnam mơ̆ng dêh čar rơbêh 344 klai USD.

Pơhiăp ƀơi mông jơnum, Khua dêh čar ơi Lê Minh Hưng pơtrun hiăp kơtưn tơlơi tơpă, bruă ngă djơ̆ hnơ̆ng čih pơkra hră pơar tơlơi phiăn; laih dơ̆ng pok pơhai sa hnơ̆ng lu hơdră pơtrut rơnoh pơđĭ kyar lir hơbit hăng bruă pơgang hơđong tơlơi bơwih ƀong huă amăng dêh čar. Ding jum prăk kăk yơh jao ngă bruă jŭ yap glăi, pơgăn bruă duh jia ƀu djop, pơtrut bruă pơčruh ngă pơphun bruă mă; djop group sĭ mơdrô pơprong, phun kông ty ngă giong tơhnal pơkă pơkra ming sĭ mơdrô hăng pơtrut ngă tui djop kơčăo bruă phun. Ding jum bruă hmua hăng pơgang ayuh hyiăng dưi jao brơi ngă tañ tơhnal pơkă pơpha rơnoh prăk mơ̆ng jơlan hơdră dêh čar djru, đing nao kơ bruă ia hơdjă rơgoh hăng bruă pơdŭ đuăi mơnuih ƀôn sang, nao dŏ pơ plơi phrâo yua đuăi kơ anih lŏn tơhlŏm, Ding jum wai lăng tuh tia hăng sĭ mơdrô ngă giong Hră pơtrun tơlơi phiăn mă bruă pơkă hnơ̆ng pơkra apui lơtrik VIII, pơhlom brơi djop apui yua.