Ngă tui jơlan hơdră bưp mơnuih ƀôn sang ruah khua tơdơi kơ jơnum lok blung a, Khua pơ ala mơnuih ƀôn sang dêh čar tal XVI, mơguah lơ 4/5, Khua git gai pơ ala mơnuih ƀôn sang dêh čar ơi Trần Thanh Mẫn hrŏm ƀing Khua pơ ala mơnuih ƀôn sang ƀôn prong Hồ Chí Minh (anih plĕ hră mrô 12) bưp mơnuih ƀôn sang ruah khua. Mông bưp hơmâo pơphun ƀơi anăp pơ să Hóc Môn hăng lăng nao rai mơng ataih hăng 10 anih pơkŏn ƀơi hơdôm boh să amăng ƀôn prong Hồ Chí Minh. Amăng mông bưp, pơ ala brơi Khua pơ ala mơnuih ƀôn sang dêh čar, Khua git gai pơ ala mơnuih ƀôn sang dêh čar ơi Trần Thanh Mẫn lăi glăi 16 tơlơi tơña mơng mơnuih ƀôn sang hăng 6 grup bruă.

Bơdjơ̆ nao lŏn mơnai, dưm dăp man pơdong, sang dŏ, hơdôm bruă mơ̆ mơnuih ƀôn sang đing nao hloh, Khua git gai pơ ala mơnuih ƀôn sang dêh čar ơi Trần Thanh Mẫn brơi thâo ƀing khua pơ ala hơmâo tơlơi pơtrun mrô 254 pơkă sa, dua hơdră bruă tong ten kiăng pơsir hĭ tơnap tap, gun găn amăng ngă tui tơlơi phiăn lŏn mơnai. Khua git gai pơ ala mơnuih ƀôn sang dêh čar ơi Trần Thanh Mẫn brơi thâo, Ding jum kơđi čar hơmâo tŭ ư hăng tơlơi črâo trun pơjing tơlơi phiăn ƀôn prong yôm phăn amra pơgôp pơsir hĭ tơnap tap, gun găn, ngă gêh gal kiăng ƀôn prong pơđĭ kyar djop mơta amăng bơwih ƀong huă-mơnuih mơnam, pơhlôm rơnuk rơnua-hơđong hăng pơjing anih anom kơđi čar.