Ngă tui bruă bưp mơnuih ƀôn sang ruah khua tơdơi kơ Jơnum lok Sa, Khua pơ ala mơnuih ƀôn sang dêh čar tal 16, mơguah tom brơi (lơ 4/5), Khua git gai Ping gah, Khua mir sir ơi Tô Lâm hrŏm hăng ƀing khua pơ ala mơnuih ƀôn sang dêh čar ƀơi anih ruah khua mrô 1 Ƀôn prong Hà Nội, pioh mông bưp mơnuih ƀôn sang ƀơi 10 boh phường Ba Đình, Ngọc Hà, Giảng Võ, Đống Đa, Kim Liên, Văn Miếu – Quốc Tử Giám, Láng, Ô Chợ Dừa, Hoàn Kiếm  laih anun Cửa Nam či pơthâo glăi bruă jơnum hăng lăi glăi hlao hơdôm tơlơi tơña, tơlơi rơkâo, tơlơi pơgôp hiăp mơ̆ng mơnuih ƀôn sang.

Ƀơi mông bưp, lăi glăi tơlơi tơña mơ̆ng mơnuih ƀôn sang bơdjơ̆ nao bruă ngă tui gong gai dua gưl, Khua git gai Ping gah, Khua mir sir ơi Tô Lâm pơsit, mơnuih ƀôn sang brơi thâo gong gai ngă bruă hơbôt tui, hơdeč tui laih, ngă hră pơ-ar hai amuñ tui mơn. Samơ̆, tơlơi mơnuih ƀôn sang kiăng lĕ anih ngă bruă phrâo khŏm hơmâo tơlơi pơplih sit nik hloh amăng bruă bơwih brơi mơnuih ƀôn sang hăng anom bơwih ƀong; pơ să khŏm jê̆ giăm, nao hrŏm hăng mơnuih ƀôn sang, thâo djŏp tơlơi kiăng ĕp bruă mă, pơtŏp bruă, pơplih bruă mă, pơtruh gong gai hăng anom bơwih ƀong, kiăo tui bruă pơtô pơjuăt nao khŏm nao hrŏm hăng bruă mă, hăng tơlơi hơdip rim hrơi mơ̆ng mơnuih ƀôn sang. Khua git gai Ping gah, Khua mir sir ơi Tô Lâm lăi dlăm, hơdôm jơlan hơdră prong kiăng ƀôn prong Hà Nội pơƀut git gai hăng pơphun ngă pơ anăp, amăng anun, Hà Nội khŏm dưm Tơlơi phiăn plơi prong jưh jom hăng čuk pơkra Plơi prong jưh jom ha anih, djơ̆ hrŏm đah mơ̆ng ngă tui.