Mơguah lơ 18/5, Ding jum boh thâo ia rơgơi pơphun mông ngă lơphet pioh hơdor hrơi boh thâo ia rơgơi, boh thâo măi mok hăng pơplih pơčeh phrâo Việt Nam hăng Jơnum pok pơhai yua boh thâo phrâo hăng anăn “Boh thâo ia rơgơi, boh thâo măi mok, pơplih pơčeh phrâo hăng pơplih mrô-Tơlơi pơsur phun mơng hơbô̆ bruă pơđĭ kyar phrâo”. Đĭ pơhiăp amăng mông ngă lơphet, Khua dêh čar ơi Lê Minh Hưng pơsit tong, Hrơi boh thâo ia rơgơi, boh thâo măi mok hăng pơplih pơčeh phrâo Việt Nam ƀu djơ̆ kơnong lĕ hrơi pơpŭ kơ ƀing rơgơi kơhnâo, ƀing kơsem min đôč ôh mơ̆ ăt pơsur pran pơ-ư ang kơ tơlơi thâo thăi ƀơi Việt Nam.

Khua dêh čar lăi pơtong, boh thâo ia rơgơi, pơplih pơčeh phrâo hăng pơplih mrô lĕ tơlơi pơsur phun kiăng ngă tui jơlan gah pơđĭ kyar lŏn ia; laih dong rơkâo Ding jum boh thâo ia rơgơi hăng boh thâo măi mok đing nao pơsir hĭ tơlơi gun kơ bruă mă yua prăk kak, đing nao ngă rơnoh brơi pơkra măi mok phun,  măi mok mă yua sui pơ anăp hăng anom bơwih ƀong yua boh thâo ia rơgơi.