Tŭ ư tơlơi jak iâu mơ̆ng Khua dêh čar Kur, ơi Samdech Techo Hun Sen, Khua kual ASEAN thun 2022, Khua dêh čar ơi Phạm Minh Chính amra nao čuă jơmư sit nik dêh čar Kur mơ̆ng lơ 8-9/11 hăng mut jơnum hrom khua mua pơprong ASEAN hăng jơnum pơkŏn pơdjơ̆ nao mơ̆ng lơ 10-13/11. Anai lĕ tal nao čuă sit nik dêh čar Kur blung a mơ̆ng Khua dêh čar ơi Phạm Minh Chính mơ̆ng hrơi đĭ ngă khua dêh čar hăng tal nao čuă blung a mơ̆ng sa čô khua kơnuk kơna Việt Nam nao pơ dêh čar Kur amăng thun ngă giăng mah kjăp Việt Nam-Kur thun 2022. Dua bơnah amra ngă hrom pơphun lu bruă mă hơdor glăi tal 55 thun akŏ pơjing bruă pơtom hiăp.

Amăng tal nao čuă jơmư anai him lăng ơi Phạm Minh Chính amra bơkơtuai hăng Khua dêh čar Kur ơi Hun Sen hrom hăng khua dêh čar Kur git gai jơnum ĕp bruă tuh pơ alin sĭ mơdrô kơplah wah Việt Nam-Kur, bưp pơtao dêh čar Kur ơi Norodom Sihamoni, Khua gah gơnong dlông pơ ala mơnuih ƀôn sang dêh car Kur ơi Say Chhum, Khua git gai pơ ala mơnuih ƀôn sang Kur ơi Heng Samrin hăng bưp khua mua pơprong pơkŏn amăng dêh čar Kur.