Dua bơnah hơmâo pơčrong sai, bơtŭ ư lu hơdră anăp ngă hrŏm pơsir tơlơi tơnap tap, pơtrut bruă ngă hrŏm hlom bom hloh, anăp nap pơđĭ tui bruă rô nao rai giăng mah Việt Nam-Nga anăp nao kiăng ngă bruă tŭ yua sit nik, hơđong kơjăp, yua anŏ tŭ yua kơ mơnuih ƀôn sang dua bơnah hăng pơgăng rơnuk rơnua, hơđong amăng kual, amăng rŏng lŏn tơnah.

Dua čô khua dêh čar lăi pơtong bruă ngă hrŏm anai, ba tơlơi bơwih ƀong huă, sĭ mơdrô, tuh pơ alin jing bruă mă phun, pok pơhai tŭ yua hră pơkôl sĭ mơdrô rơngai plah wah Việt Nam hăng khul ngă hrŏm bơwih ƀong huă kual ASIA-Mi kô̆, iâu klah čun Á-Âu, pok pơhư prong anih anom sĭ mơdrô gơnam tam, pơtrut bruă tuh pơ alin nao rai dua bơnah. Laih dơ̆ng, dua bơnah ăt tŭ ư hrŏm kơsem min ĕp bruă ngă hrŏm phrâo gah apui yua ia jâo ayuh, djuai apui yua rơgoh, pơkra ming glăi. Lăp đing nao, dua čô khua hơ̆k mơak bơni mơ̆n kơ bruă kĭ pơkôl ngă hrŏm man pơdong sang măi apui lơtrik ayuh ƀơi Việt Nam, pok phrâo anăp ngă bruă yom hloh mơ̆ng dua bơnah dêh čar.