Amăng mông bưp bơ ră ruai mơak jĕ giăm biă mă, Khua dêh čar ơi Phạm Minh Chính lăng yôm tơlơi glăm ba hăng djru prong mơ̆ng khua čih pioh sang gum hơbit djop dêh čar amăng bruă pơgang rơnuk rơnua, hơđong jar kmar, pơsir lu tơlơi rung răng, laih dơ̆ng lăi, Việt Nam dong yua hăng djru pơgôp pran jua amăng bruă mă tui anun. Khua dêh čar ơi Phạm Minh Chính dong yua hơdôm tơlơi đing nao ră anai mơ̆ng Khua čih pioh sang gum hơbit djop dêh čar, amăng anun prăp lui jơnum khua mua pơprong kơñ pơgi ni anăp, him lăng pơphun amăng thun 2024. Khua dêh čar brơi thâo, Việt Nam hlăk hur har ngă hrŏm djop anom bruă jar kmar mơ̆ng sang gum hơbit djop dêh čar, pok pơhai lu bruă mă ngă hrŏm, boh nik ñu pơgang rơnuk rơnua jar kmar, mut hrŏm khul ling tơhan pơgang tơlơi rơnuk rơnua mơ̆ng sang gum hơbti djop dêh čar amăng lu anih rung răng, pơgang anŏ ngă bơkơnar mơnuih mơnam, ƀu lui kơ sa čô dŏ glăi pơ klôn....Ƀrô tal anai, Khua dêh čar ơi Phạm Minh Chính jak iâu Khua čih pioh sang gum hơbit djop dêh čar ơi Antonio Guterres rai čuă Việt Nam.

Ăt ƀơi New York, dêh čar Mi mơn, Khua dêh čar ta, ơi Phạm Minh Chính hmâo tŭ jum Khua pơ ala mơ̆ng Khua mir sir dêh čar Mi kơ tơlơi ayuh hyiăng John Kerry črông lô hơdôm bruă pioh tañ pok pơhai hơdôm tơlơi pơkôl yôm phăn mơng tal hyu čuă biă ñu amăng bruă bŏng glăi hăng ayuh hyiang pơplih. Hrŏm amăng lơ 21/9  mơn, yap tui mông ƀơi dêh čar Mi, Khua dêh čar ta, ơi Phạm Minh Chính hmâo bơkơtuai laih hơdră bruă hmâo anăn: “Pơtrut pơđĭ kyar hăng pơđĭ kyar kơjăp phik amăng bruă bơwih ƀong đơ đam rŏng lŏn tơnah  pơplih” hăng ƀing nai tha prin, ƀing juăt bruă bơwih ƀong, mơnuih kơsem min ba jơlan hlâo mơng hơdôm bôh sang hră đại học Harvard, Columbia, Yale. Anai lĕ hơdôm gơnong bruă pơtô pơhrăm hăng kơsem min hơdră bruă hmâo phiăn juăt mơ̆ng sui, tơhnal pơhmăi hăng anăn hmư̆ hing ƀơi wot dêh čar Mi hăng đơ đam rŏng lŏn tơnah. Pơhiăp tui akô̆ bruă, Khua dêh čar ta, ơi Phạm Minh Chính lăi rơđah Việt Nam lăng yôm na nao bruă kơtưn bơkơtuai, lăi pơthâo nao rai, lăi pơthâo hơdră bruă hơdôm tơlơi bơwih ƀong, pơđĭ kyar hăng hơdôm anom kơsem min ba jơlan hlâo mơng rŏng lŏn tơnah./.