Ƀơi mông bưp, Khua dêh čar ơi Phạm Minh Chính lăi pơtong, Việt Nam lăng yôm hăng dong yua tơlơi gơgrong ba ngă gong jơlan mơ̆ng Sang gum hơbit djop dêh čar amăng bruă kơđi čar ƀơi rŏng lŏn tơnah, kiăng bong glăi hăng tơlơi lông lăng hrŏm prong biă mă ră anai laih anun Việt Nam ƀuăn amra djru hrŏm tong ten amăng bruă Khul ding kơna Sang gum hơbit djop dêh čar tal 78 đing nao. Khua khul ding kơna sang gum hơbit djop dêh čar ơi Dennis Francis lăng yôm tơlơi rô nao rai Sang gum hơbit djop dêh čar hăng Việt Nam.

Ơi Dennis Francis lăi lĕ, Việt Nam hơmâo lu boh tơhnal ngă bruă djru mơnuih ƀôn sang pơklaih mơ̆ng ƀun rin ư̆ rơpa hăng pơđĭ kyar lŏn ia, dưi kah pơpha djru hrŏm hăng rŏng lŏn tơnah, hrŏm hăng anun pơtrut ngă hrŏm hơdôm tơhnal pơkă pơđĭ kyar hơđong kjăp, bong glăi tơlơi pơblih ayuh hyiăng lŏn tơnah, pơhlôm djop mơnong ƀong huă hơđong. Khua khul ding kơna Sang gum hơbit djop dêh čar tŭ ư amra ngă hrŏm Việt Nam pơtrut ngă tui djơ̆ Tơlơi phiăn phun mơ̆ng Sang gum hơbit djop dêh čar, tơlơi phiăn jar kmar hăng bruă ngă hrŏm lu bơnah dêh čar.

Ăt amăng tal anai mơ̆n, Khua dêh čar ơi Phạm Minh Chính hơmâo mông bưp Khua dêh čar Thai Lan. Dua bơnah tŭ ư hrŏm pok pơhai hơdôm bruă phun ngă hrŏm pơtrut tơlơi giăng mah pŭ ƀăn rô nao rai yôm phara Việt Nam-Thái Lan kiăng hơmâo boh tŭ yua prong, sit nik hăng kjăp hloh.