Amăng mông bưp, Khua dêh čar ơi Phạm  Minh Chính pơtŏng sit Việt Nam lăng yôm tơlơi rô nao rai giăng mah hăng gum hrŏm lu mơta hăng Costa Rica. Khua dêh čar ơi Phạm Minh Chính rơkâo dua bôh dêh čar kơtưn đĭ pran đăo kơnang kơđi čar hluai tui bruă bơkơtuai grŭp hơdôm gưl, biă ñu gưl dlông, lăi pơthâo bruă kơđi čar; pok prong gum hrŏm bơwih ƀong, pơtrut bruă sĭ mơdrô dua bơnah, bơkơtuai bôh thâo đưm hăng tô nao rai mơnuih ƀôn sang.

Dua gơñu tŭ ư črâo ba hơdôm ding jum, gơnong bruă bơdjơ̆ nao mơ̆ng dua bơnah gum hrŏm ĕp jơlan gah phrâo, hơdôm bruă pioh pơtrut gum hrŏm sĭ mơdrô, tuh pơplai dua bơnah hluai tui anô̆ gal hăng tơlơi kiăng mơ̆ng dua bơnah. Pơsit yôm hơdôm tơhnal gal gum hrŏm kơplah wah Việt Nam hăng Costa Rica amăng hơdôm bruă: bruă đang hmua, tuai čuă ngui, pơkra gơnam mă yua, măi mok, pơplih mrô, dua gơñu tŭ ư hrŏm dua bôh dêh čar khom kơtưn gum hrŏm amăng hơdôm bruă anai./.