Ƀơi mông bưp, Khua dêh čar ơi Phạm Minh Chính bơni kơ tơlơi khăp hăng tơlơi dong yua kơtang mơ̆ng Khua mir sir dêh čar Mi, ơi Joe Biden pioh kơ bruă pơđĭ kyar tơlơi rô nao rai Việt Nam hăng Mi laih anun čang rơmang pơ anăp anai, mah ngă bruă hơgĕt hai, Khua mir sir ơi Joe Biden ăt amra djru ba hăng dong yua lu hloh kơ bruă ngă giăng mah dua bơnah. Hok mơak dưi bưp glăi Khua dêh čar ơi Phạm Minh Chính, Khua mir sir ơi Joe Biden lăi pơtong, khua dêh čar ơi Phạm Minh Chính lĕ gơyut hiam klă mơ̆ng dêh čar Mi.

Khua mir sir ơi Joe Biden pơdah pran jua hok mơak lơ̆m ƀuh, amăng rơwang bruă mơ̆ng ñu, dua boh dêh čar hơmâo pơđĭ tui hơnơ̆ng ngă giăng mah jing bơnah ngă hrŏm hlom bom hloh hăng lăi pơtong tơlơi dong yua kơ bruă ngă giăng mah Mi hăng Việt Nam sit mơ̆n ƀu pơdơi ôh pơđĭ kyar na nao.

Ăt amăng tal jơnum hrŏm anai, Khua dêh čar ơi Phạm Minh Chính hơmâo bưp hăng bơkơtuai hrŏm tơpă, klă hiam hăng khua mua hơdôm dêh čar Malaysia, Angle, Italia, Thổ Nhĩ Kỳ, Bồ Đào Nha, Mexico, Nam Phi, Angola, Tanzania, Qatar hăng Saudi Arbia.