Khua mir sir ơi Vladimir Putin pơsit tong, tal nao čuă mơng Khua dêh čar ơi Phạm Minh Chính yôm phăn biă mă amăng bruă tŏ tui hăng pơtrut ngă hrŏ dua bơnah. Amăng mông bưp, dua čô khua hơmâo pơlăi nao rai hơdôm tơlơi sit nik hăng jơlan gah, hơdră bruă pơđĭ kyar bơwih ƀong huă-mơnuih mơnam mơng rĭm boh dêh čar. Amăng hrơi blan rơgao, hăng tơlơi gir run mơng Kơnuk kơna dua bơnah, djop ding jum, gơnong bruă, ƀon lan bơdjơ̆ nao, tơlơi rô nao rai ngă hrŏm djop mơta bruă kơplah wah Việt Nam - Nga glăk pơđĭ kyar hiam klă.

Hluai tui tơlơi anun, Khua dêh čar ơi Phạm Minh Chính hăng Khua mir sir Nga ơi Vladimir Putin hơmâo pơlăi nao rai djop kơ tơlơi kiăng, tơlơi gal mơng rĭm boh dêh čar, pơsit tong hơdôm bruă akŏ phun, jơlan gah pơprong amăng ngă hrŏm dua bơnah pơ anăp anai, kiăng ngă dơlăm ƀiă dong tơlơi rô nao rai ngă hrŏm yôm phăn djop mơta Việt Nam-Nga, lăng anai lĕ tơlơi đing nao sui pơ anăp kơplah wah dua bơnah.