Ƀơi mông bưp, Khua dêh čar ơi Phạm Minh Chính hăng Kơ-iăng khua mir sir yă Haris lăng mơ-ak kơ hơdôm tơlơi đĭ kyar kơjăp kơtang mơ̆ng tơlơi ngă hrŏm abih bang kơplah wah Việt Nam hăng Mi, anăp nao pơđĭ tui tơlơi rô nao rai ngă hrŏm amăng hrơi blan pơ anăp, biă ñu amăng bruă bơwih ƀong - sĭ mơdrô - tuh pơ alin, boh thâo măi mok phrâo, pơčeh phrâo, pơtô pơjuăt, jơnum bưp mơnuih ƀôn sang hăng pơsir hĭ tơlơi răm ƀăm mơ̆ng rơnuk blah ngă.

Khua dêh čar lăng yôm biă mă hơdôm tơlơi gum pơgôp mơ̆ng yă Kamala Haris kơ tơlơi rô nao rai dua bơnah, biă ñu bruă djru ba mơnuih ƀôn sang Việt Nam jrao vắc xin pơgang Covid-19 laih anun čang rơmang bưp glăi ñu dong pơ anăp anai kiăng pơsit rơđah hloh tơlơi kĭ pơkôl đah mơ̆ng pơtrut tui tơlơi ngă hrŏm dlăm hloh, tŭ yua, sit nik hloh. Khua dêh čar ta brơi thâo, Việt Nam glăk ngă hrŏm hăng dêh čar Mi prăp či čơkă Khua mir sir ơi Joe Biden klă hloh amăng tal čuă jơmư pơ anăp anai.