Hok mơak hơmâo bưp neh met wa amăng tal nao čuă sit nik dêh čar Nga, Khua dêh čar brơi thâo, mah nao pơ čar Nga lu wơ̆t laih, samơ̆, rim wơ̆t nao hơmâo bưp hăng ră ruai tom neh met wa jing ñu mơak, ngă ol kơdol biă mă ƀơi anăp “tơlơi khăp djuai ania - tơlơi hơdor tơngia mơnuih ƀôn sang” mơ̆ng abih bang mơnuih ƀôn sang čar ta glăk dŏ pơ čar Nga - sa khul gum pơgôp, triang kơtang, gir kơtir, mă bruă truh kih hăng thâo pơmin djru glăi lŏn ia, plơi pla.

Khua dêh čar čang rơmang mơnuih Việt Nam pơ čar Nga jai hrơi gum pơgôp, hơđong hloh, dŏ kjăp amăng anih gơñu glăk dŏ; jing mơnuih pơtruh ngă kjăp tui tơlơi rô nao rai dua boh dêh čar, čang rơmang mơnuih ƀôn sang ngă tui tơlơi phiăn pơ anih glăk dŏ hơdip, hrăm hră, mă bruă triang hloh, hrăm tui tơlơi phrâo, boh thâo măi mok, tơlơi thâo rơgơi pơ anai, pơtrut tuh pơ alin, hơmâo lu bruă mă klă hloh lăng glăi Lŏn ia ta. Khua dêh čar kiăng Sang anih jưh pơ ala Việt Nam pơ Nga ngă klă hloh bruă lăng ba, pơgang ba mơnuih ƀôn sang dŏ pơ čar rơngiao.