Ră anai, Việt Nam hơmâo giăm 900 rơbâo anom bơwih ƀong glăk mă bruă, năng ai ñu 14,4 rơbâo anom ngă ƀong hrŏm hăng rơbêh 5 klăk boh sang anŏ sĭ mơdrô. Hơdôm anom bơwih ƀong pơgôp lu biă mă rơbêh kơ 60% GDP, năng ai ñu 30% mrô mơnuih mă bruă glăk dŏ mă bruă. Rơngiao kơ bơwih ƀong sĭ mơdrô, ƀing bơwih ƀong prong ăt gơgrong hăng mơnuih tơpuôl mơn, lu mơnuih glăk gir lŏm tơlơi rin rơpa tơ-oa asơi, hơdor tơngia. Pơhiăp ƀơi mông bưp, Khua dêh čar ơi Phạm Minh Chính hơmâo lăi pơhmư̆ tơlơi tơña bla, tơlơi bơni mơ̆ng Khua git gai Ping gah ơi Nguyễn Phú Trọng kơ abih bang mơnuih bơwih ƀong, anom bơwih ƀong Việt Nam. Khua dêh čar pơsit amra nao hrŏm hăng anom bơwih ƀong.

Hơđong tơlơi bơwih ƀong prong, pơgăn pơđĭ nua gơnam soh phiăn, pơtrut đĭ kyar, hơđong tơlơi dưm kơnar mơ̆ng tơlơi bơwih ƀong. Pơtrut pơplih klă tui anih tuh pơ alin sĭ mơdrô dưm kơnar, mơ-ak, rơđah rơđông; lui hĭ bruă ngă tơnap ƀu kiăng đơi, pơđĭ tui hơnong pơkă bơkơtưn dêh čar, pơtrut pơplih anom bruă ngă hră pơ-ar, akŏ pơjing bơwih ƀong mrô, Kơnuk kơna mrô, jê̆ giăm hăng mơnuih ƀôn sang laih anun anom bơwih ƀong.