VOV4.Jarai-Mơguah lơ 13/10, ƀơi ƀôn prong Cần Thơ, Khua dêh čar ơi Phạm Minh Chính hăng khua mua grup pơ ala mơnuih ƀôn sang dêh čar ƀơi Cần Thơ nao bưp mơnuih ruah khua hlâo kơ jơnum lok pă, khua mua pơ ala mơnuih ƀôn sang dêh čar tal XV. Ƀơi mông bưp, mơnuih ruah khua ƀơi Cần Thơ pơdah pran jua mơak ƀuh tơlơi bơwih ƀong huă mơnuih mơnam lŏn ia 9 blan rơgao tŭ mă lu boh tơhnal yôm, hiam klă biă mă djop bruă; čang rơmang hăng rơkâo hăng ƀing pơ ala mơnuih ƀôn sang, kơnuk kơna ăt hơmâo hơdră pơsir klă hloh tơlơi tơnap tap, gun gan ră anai amăng bruă blơi ia jrao, gơnam yua pơjrao duam ruă, bruă tuh pơ alin gah bruă ia jrao, jơlan hơdră pơblih prăk blan, bruă mă pơđĭ kyar bơwih ƀong huă ngă hmua…..

Tơdơi kơ hmư̆ mơnuih ruah khua rơkâo đĭ, Khua dêh čar ơi Phạm Minh Chính lăi glăi hăng mơnuih ruah khua thâo tơlơi pơhing boh tơhnal bơwih ƀong huă amăng dêh čar 9 blan rơgao, laih dơ̆ng pơčrâo rơđah mơ̆n anŏ aka ƀu djơ̆ găl, dŏ kơƀah….Khua dêh čar pơtrun hiăp djop anom bruă, djop tơring čar ăt ngă tui sa hnong ba glăi boh tŭ yua amăng bruă mă, amăng anun pơhlôm pơgang klin Covid 19, pơhlôm hơđong anih anom sĭ mơdrô, nua gơnam sĭ mơdrô, djop mơta gơnam yua kơ bruă mă bơwih ƀong huă, djru tơlơi hơdip mơda, biă mă ñu amăng bơyan ngă yang thun phrâo, Hrơi mơak akŏ thun phrâo 2023; mơneč tơlơi gêh găl anih anom sĭ mơdrô mơ̆ng dêh čar tač rơngiao amăng hrơi mông rơnuč thun.

Nay Jek: Pơblang