Mơnuih ƀôn sang ruah khua čang rơmang hăng rơkâo đĭ khua mua pơ ala mơnuih ƀôn sang dêh čar, kơnuk kơna ăt hơmâo dơ̆ng lu hơdră pioh pơtrut bruă ngă djơ̆, pơsir tơlơi tơnap tap dŏ gun ră anai amăng bruă blơi ia jrao, gơnam yua pơjrao duam ruă, tuh pơ alin kơ bruă ia jrao ƀơi plơi pla. Khua dêh čar ơi Phạm Minh Chính lăi pơthâo hăng mơnuih ƀôn sang tơlơi pơhing kơ bruă mă bơwih ƀong huă mơnuih mơnam dêh čar 10 blan thun 2022, tơlơi pơhing pơblih amăng dêh čar, ƀơi rŏng lŏn tơnah, laih dơ̆ng brơi thâo bruă mă, hơdră pơsir phun hơdôm blan rơnuč thun 2022.

Tui hăng anun, Khua dêh čar pơtrun hiăp djop gưl, djop tơring čar anăm ngă amưng ôh git gai tong ten, djơ̆ lăp, beč bal, thâo pơčeh phrâo, mơneč mă tơlơi gêh găl kiăng rŭ glăi tơlơi bơwih ƀong huă, pơđĭ kyar hơđong kjăp. Gleng nao hlâo hloh bơwih ƀong huă prong, pel ĕp pơgăn prăk trun nua, kiăng pơhlôm hơđong bơkơnar bơwih ƀong huă ƀơi dêh čar-lăng anai jing bruă mă phun, ječ ameč ră anai.