Pơtum glăi mông Jơnum, Khua dêh čar ơi Phạm Minh Chính pơsit, Kual lŏn dăo ia krông Cửu Long hăng iao gah jing anih yom biă mă gah kơđi čar, bơwih ƀong huă - mơnuih mơnam, pơgang lŏn ia, rơnuk rơnua, anih anom glai klo, pơtom hiăp hăng čar rơngiao; jing “bah amăng mut” gah Dơnung mơ̆ng lŏn ia ta hăng nao hrŏm bruă akŏ pơdong, pơgang ba lŏn ia ta.

Khua dêh čar lăi dlăm, hơdôm ding jum, anom bruă, tơring tơrang khŏm pơƀut ngă jơlan hơdră wai lăng djuai ania, tơlơi đăo; ngă tui jơlan hơdră đĭ kyar bơwih ƀong huă mơnuih mơnam, djru kiăng hơmâo bruă mă, pơsir tơlơi bơrơdjơ̆ pơsao, tơlơi hil ruă; pơtrut kiăng ngă tơlơi hiam, pran jua klă, gơgrong mă pô mơ̆ng mơnuih ƀon sang amăng bruă đĭ kyar bơwih ƀong huă - mơnuih mơnam hăng djă pioh, pơtrut tui anŏ yom klă mơ̆ng gru grua, tơlơi phiăn đưm; pơđĭ tui tơlơi hơdip mơda, hơmâo prăk kăk; glŏm lui djŏp tơlơi soh sat, ƀu klă, bĕ hĭ tơlơi plư pleč jak iâu pơblư̆ kơnuk kơna. Ƀơi anăp, amăng thun 2026, Khua dêh čar jao kơ hơdôm ding jum, anom bruă, tơring čar ƀôn prong ngă pơgiong 7 mơta bruă prong, akŏ phun kơ bruă lăng ba, đĭ kyar bơwih ƀong, gru grua, pơtô hrăm, ia jrao kual lŏn dăo ia krông Cửu Long./.