Lơ 16/9, ƀơi Anom bruă Kơnuk kơna, Khua dêh čar ơi Phạm Minh Chính git gai jơnum hăng khua mua djop ding jum, anom bruă pơdjơ̆ nao, kiăng pơčrong sai tong ten tơlơi pơhing ngă tui Hră pơtrun mrô 36 kơ Bruă mă yôm pơđĭ kyar hơđong kjăp bơwih ƀong huă mơ̆ng kual ia rơsĭ Việt Nam truh thun 2030, anăp nao pơ thun 2045 hăng lu boh yôm phun pơdjơ̆ nao amăng Hră pơtrun jơnum ruah khua ping gah dêh čar tal XIII.

Tui hăng anŏ pơblang tong ten, djop djel tơlơi pơhing jar kmar, amăng kual hăng ia rơsĭ Ngŏ ăt kah hăng anŏ kiăng pơđĭ kyar mơ̆ng lŏn ia amăng rơnuk phrâo, Khua dêh čar ơi Phạm Minh Chính pơčrâo bruă kơ djop ding jum, anom bruă hăng djop tơring čar pơdjơ̆ nao, kơñ pơgi kiăng kiăo tui djơ̆ jơlan hơdră mơ̆ng Ping gah, jơlan hơdră tơlơi phiăn kơnuk kơna, amăng anun Hră pơtrun jơnum ruah khua ping gah dêh čar tal XIII, Hră pơtrun mrô 36 kơ Bruă yôm pơđĭ kyar hơđong bơwih ƀong huă ƀơi ia rơsĭ Việt Nam truh thun 2030, anăp nao pơ thun 2045; Hră pơtrun mrô 44 kơ bruă yôm pơgang Lŏn ia amăng rơnuk phrâo, prăp hlâo, ngă tui hur har pok pơhai tŭ yua hloh djop bruă, kiăng dưi ngă djơ̆ tơhnal pơkă yôm tŭ yua hloh amăng djop bơnah lăng nao.