VOV4.Jarai - Khua dêh čar ơi Phạm Minh Chính git gai jơnum lăng nao rai mơng ataih hăng 8 boh tơring čar kual Tong krah hăng Dap kơdư kiăng kơ lăng glăi bruă rŭ pơdong glăi anŏ răm rai hăng lăng glăi tơlơi găn rơgao amăng bruă pơhlôm hlâo kơthel mrô 4. Đĭ pơhiăp amăng mông jơnum, Khua dêh čar rơkâo, ječ ameč rŭ pơdong glăi anŏ răm rai tơdơi kơthel pưh rai, rơmet pơagaih jum dar, kơtuai jơlan glông kiăng kơ tañ pot glăi tơlơi hơdip tui hơđăp hăng pơhlôm brơi rơdêh đuăi nao rai. Tô glăi, pơkra ming apui lơtrik, glông pôr pơhing, ia hơdjă pioh yua rĭm hrơi, brơi mơnuih ƀon sang hơđong tơlơi hơdip.

Đing nao bruă djru brơi mơnuih ƀon sang, biă mă ñu hơdôm boh sang anŏ tơnap tap pơkra ming sang glưh, pok bơbung, răm rai; pơkra ming hơdôm ring bruă amăng plơi pla, biă mă ñu lĕ sang hră, sang ia jrao … kiăng pơhlôm gêh gal brơi čơđai pơwŏt glăi nao sang hră, hơmâo anih khăm pơjrao brơi mơnuih ƀon sang. Hơkrŭ glăi ngă hmua răm rai yua kơthel kiăng pơhlôm gơnam ƀong huă, hơđong tơlơi hơdip pơ anăp anai.

Siu Đoan: Pơblang