Tlam mơmŏt lơ 07/10, ƀơi sang bruă Kơnuk kơna, Khua dêh čar ơi Phạm Minh Chính git gai jơnum lok 16 Khul khua git gai mơ̆ng dêh čar kơ bruă pơgăn hyu mă akan hơdang ƀu găl tơlơi phiăn, ƀu lăi pơthâo hlâo hăng ƀu ngă djơ̆ tơlơi pơtrun IUU. Ƀơi mông jơnum online, pơƀuh ƀô̆ mơta hăng 21 boh tơring čar, ƀôn prong ter hang ia rơsĭ.

Khua dêh čar ơi Phạm Minh Chính lăng yom pran jua tơlơi mă bruă  tơpă mơ̆ng djop ding jum, anom bruă ƀơi gơnong dlông, djop tơring čar, ƀôn prong pơtrut tañ, kiăng pơsir hĭ kak kơñĭ tơlơi pơtrun IUU.

Mơ̆ng rơwang hrơi tơjuh hlâo kơ anai, jŭ yap glăi, pơtă pơtăn abih bang mrô ƀattô, song nan aka ƀu hơmâo hră dưi hyu mă akan hơdang hrŏ ƀiă laih; hơdôm boh ƀattô ƀu djop tơlơi pơkă gêh găl hyu mă akan hơdang; aka ƀu dưm truă măi pioh krăp lăng, anih dŏ, jơlan nao amăng ia rơsĭ, dưm truă video pioh krăp lăng rơgơi phrâo lĕ ră anai lu tui; aka ƀu hơmâo čih anăn ƀattô pơpă ôh phrâo, ngă soh glăi tơlơi pơtrun, dưi pơhiăp nao rai, ƀudah nao rơgao ling pơkă dưi mă akan hơdang amăng ia rơsĭ; aka ƀu hơmâo ƀattô pơpă ôh ngă soh glăi tơlơi phiăn kual ia rơsĭ dêh čar tač rơngiao hăng mă pơkong pơsir kơđi….Lăi pơtong, pran jua mă bruă khom khut khăt, hmar, tañ pơsir hơdôm tơlơi pơkă pơdjơ̆ nao tơlơi pơtrun IUU, hơgĕt tơlơi hơmâo plĕč ƀlor amăng bruă hyu mă akan hơdang, klĕ dơ̆p ƀu gưt duh jia hơmâo pơgăn laih. Khua dêh čar ta lăi, tơdah kiăng hơmâo hơdră hơgĕt kơtang hloh, Ding jum Bruă hmua hăng Ayuh hyiăng hrŏm hăng djop tơring čar rơkâo đĭ, pơdah thâo hăng kơnuk kơna pioh pơsir hĭ giong abih.