Tơdơi kơ hmư̆ lu tơlơi pơgôp hiăp, lăi pơthâo, Khua dêh čar ơi Phạm Minh Chính pơtrun hiăp kơ grup čih pơkra glăi, khom čih pioh hơdôm tơlơi pơgôp hiăp mơ̆ng ƀing pơ ala nao jơnum, kiăng pơhrua nao djop hăng rơkâo Ding jum kơđi čar pơčrâo ba dơ̆ng. Khua dêh čar lăi pơtong, bruă čih pơkra Hră lăi pơthâo Bơwih ƀong huă mơnuih mơnam amăng thun blan rŏng lŏn tơnah hlăk pơblih hmar, tơnap tap, bơbeč djơ̆ prong kơ dêh čar.

Khua dêh čar rơkâo khom sem lăng tong ten tơlơi pơhing hlăk hơmâo, mă mơ̆ng tơlơi hơmâo sit nik anun čih tơpă, pơpŭ tơlơi tơpă hơmâo biă mă rim hrơi, ngă anŏ pơkă pioh čih pơkra hră pơtrun  hnun kah djơ̆ lăp. Khua dêh čar ăt pơčrâo rơđah, bruă kiăng lĕ prong, hrơi blan ƀiă đơi, bruă  lu, mơnuih ƀôn sang čang rơmang biă mă kiăng kơsem min ngă hiư̆m pă tơlơi pơtrun anun dưi ngă tui sit nik, djơ̆ lăp amăng tơlơi hơdip mơda rim hrơi, khom dưi ngă djop 2 tơhnal pơkă 100 thun kah hăng Jơnum ruah khua ping gah tal XIII hơmâo ba tơbiă laih.