Tlam lơ 24.8, Khua dêh čar ơi Phạm Minh chính git gai jơnum Kơnuk kơna pơčrong sai sa hnong bruă čih pơkra tơlơi phiăn blan 8 kơ dêh čar, bơkơtuai ten hơdôm tơlơi phiăn: Tơlơi phiăn pơkă kơ bruă tuh tia pơkra ming măi mok gah ling tơhan, Tơlơi phiăn plơi prong jưh jom čih pơkra glăi, tơlơi phiăn rơnuk rơnua jơlan glông, tơlơi phiăn jơlan glông nao rai. Ƀơi mông jơnum, Kơnuk kơna hmư̆ hơdôm sang bruă lăi pơthâo klah čun tơlơi phiăn, lăi pơthâo bruă čih pơkra glăi, čih pioh tơlơi pơgôp hiăp pơhrua hơdôm mơta tơlơi amăng tơlơi phiăn; čih pơƀut tơlơi pơgôp hiăp mơ̆ng djop ding jum, anom bruă sem glăi hơdră mă bruă, hră pơar prăp lui; hơdôm tơlơi kiăng ngă, tơlơi pơkă čih pơkra tơlơi phiăn; anŏ găl sa hnong, tŭ ư sa bruă pơdjơ̆ nao mơ̆ng hơdôm tơlơi phiăn pơkŏn; ĕp lăng tơlơi thâo thăi mơ̆ng jar kmar; laih dơ̆ng pơblang rơđah hơdôm tơlơi phun yôm mơ̆ng lu mơnuih rơgơi kơhnâo kiăng čih pơgiong hơdrôm hră tơlơi phiăn.

Khua dêh čar pơtrun hiăp kơ djop ding jum anom bruă jŭ yap glăi, pơtong rơđah tơlơi pơkă tơdah kiăng lui hĭ, pơblang tong ten tơlơi pơkă phrâo pơhrua nao phrâo. Khua dêh čar pơtă pơtăn, pơ anăp anai, bruă čih pơkra tơlơi phiăn kơ dêh čar amra tơnap tap hloh. Kơnuk kơna, ding kơna amăng kơnuk kơna khom khut khăt gir run ngă tui pơblih bruă čih pơkra tơlơi phiăn hơdră git gai lŏn ia, pơsir đut tơhnal djop tơlơi hơmâo pơtrut pơđĭ kyar bơwih ƀong huă mơnuih mơnam hmar hloh djru kơ mơnuih ƀôn sang, sang bruă sĭ mơdrô mă bruă amuñ ƀiă pơđĭ kyar bơwih ƀong huă hơđong kjăp, kiăng ngă giong bruă mă Ping gah, kơnuk kơna hơmâo pơtrun laih.