Ƀơi mông jơnum, Khua dêh čar kiăng pơƀut djŏp tơlơi hơmâo či djru ană mơnuih, pơjrao brơi mơnuih ruă, pơtŏng glăi tơlơi truh, kual pơčlah ƀu thâo mut tơbiă či djru ba mơnuih ƀôn sang. Khua dêh čar kiăng sem lăng tong ten, brơi tơhan nao djru, ngă hiư̆m pă đah mơ̆ng dưi djru ba mơnuih mơnam, iâu pơthưr abih bang mut nao pơ anih ia dăo kơtang, anih kiăng djru ba ječ ameč.

Khua dêh čar kiăng Ding jum prăk kăk brơi braih kơ hơdôm boh tơring čar; ƀơi anăp djru kơ tơring Lâm Đồng 200 klai prăk, Khánh Hòa 200 klai prăk; Dak Lăk hăng Gia Lai rim boh tơring 150 klai prăk, brơi hlao mơtăm yơh. Khua dêh čar jao bruă hlao amăng mơguah lơ 21/11, Kơ-iăng khua dêh čar ơi Lê Thành Long nao hlao pơ Gia Lai, Kơ-iăng khua dêh čar ơi Hồ Đức Phớc nao hlao pơ Dak Lăk, Kơ-iăng khua dêh čar ơi Hồ Quốc Dũng nao hlao pơ Lâm Đồng mơtăm či git gai, pơgang tơlơi truh, ming pơkra tơlơi răm ƀăm hơjan kơthel ngă; yom hloh lĕ djru ană mơnuih.