Khua dêh čar bơni kơ tơlơi gir run mơ̆ng djop ding jum, anom bruă, tơring čar, khul mơnuih ngă hrŏm bruă sĭ mơdrô hăng mơnuih ƀôn sang, lăi pơtong boh tơhnal dưi ngă laih hơmâo djru pơgôp hrŏm yom biă mă rơnoh pơđĭ kyar bơwih ƀong huă-mơnuih mơnam, pơđĭ  kơtang tơlơi git gai amăng dêh čar hăng boh tŭ yua hiam amăng bruă bơwih brơi kơ mơnuih ƀôn sang.

Khua dêh čar lăi pơtong, pơblih yua mrô mơ̆ng tơlơi pơmin pok pơhai tui hăng akŏ bruă jao, jing bruă wai lăng tui boh tŭ yua dưi ngă, lăng nao kơ gơnam pơkra ming, pơjing rai anun klă hiam kah dưi tŭ yap hăng anŏ ngă mơak pran jua ană plơi pla, sang bruă mơdrô pioh ngă hnơ̆ng pơkă dlông hloh. Bruă phun lĕ ngă giong tơlơi phiăn pơtrun, jơlan hơdră pơblih kơtang, boh nik ñu pơđĭ kyar bơwih ƀong huă djă pioh mrô hăng boh thâo ia rơgơi ană mơnuih pơjing rai. Khua dêh čar pơtrun hiăp djop ding jum tañ dăp hơdră, ming pơkra hăng ngă hră pơtrun pơtô brơi ngă tui Tơlơi phiăn Pơblih yua mrô, Boh thâo ia rơgơi ană mơnuih pơjing (Trí tuệ nhân tạo), Tơlơi hơđong plang internet, bruă sĭ mơdrô pơthâo amăng plang internet, juăt sĭ mơdrô amăng điện tử kiăng hơmâo hră tơlơi phiăn pơkă kơ bruă ngă tui sa hnơ̆ng, huăi lui soh sel tơlơi phiăn pơkă. Ding jum kông an kơsem min lăng, čih pơkra tơlơi phiăn pơdah thâo hăng Kơnuk kơna dêh čar pơsit brơi: Ngă hră pơtrun pơkă kơ bruă pơtrut sang bruă pơčeh phrâo, mă yua mrô rơnoh gah anom bruă djă pioh mrô dêh čar, khom ngă giong amăng črăn 3 blan tal I thun 2026.