VOV4.Jarai - Mơguah lơ 29/9, ƀơi Ƀirô mă bruă, Khua dêh čar ơi Phạm Minh Chính git gai mông čơkă sit nik Khua dêh čar Cuba Manuel Marrero Cruz hrŏm hăng khua mua mơng Kơnuk kơna Cuba rai čuă sit nik dêh čar Việt Nam. Amăng mông čơkă, Khua dêh čar ơi Phạm Minh Chính hăng Khua dêh čar Cuba Manuel Marrero Cruz pơphun pơčông sai.

Khua dêh čar git gai mông čơkă Khua dêh čar Cuba

Anai lĕ tal rai čuă mơng Khua dêh čar Cuba Manuel Marrero Cruz kiăng pok pơhai lu boh tơhnal kĭ pơkôl kơplah wah Khua mua dua bơnah, tŏ tui hăng pơđĭ kyar tơlơi rô nao rai yôm phăn kơplah wah Việt Nam - Cuba, pơdah tơlơi gir run mơng dua bơnah amăng bruă tŏ tui pơđĭ kyar hăng kjăp tui tơlơi rô nao rai giang mah, gum pơgôp, mut hrŏm, đăo gơnang tơdruă, ngă hrŏm djop mơta kơplah wah Ping gah, Kơnuk kơna hăng mơnuih ƀon sang dua bơnah. Ƀrô tal rai čuă, Khua dêh čar Cuba amra tŭ mă Miđai Hồ Chí Minh; nao lăng mông kĭ pơkôl lu hră ngă hrŏm kơplah wah dua bơnah; nao jơnum anom bơwih ƀong sĭ mơdrô kơplah wah Việt Nam - Cuba; bưp khua mua ƀôn prong Hồ Chí Minh hăng sa, dua bruă pơkŏn dong.

VOV/Pơblang: Siu Đoan