Tlam lơ 25/12, ƀơi Sang bruă Kơnuk kơna, Khua dêh čar ơi Phạm Minh Chính pơhmư̆ mông Jơnum đơ đam čar ta pơtum glăi 20 thun ngă tui Tơlơi pơtrun mrô 36 mơ̆ng Ding jum kơđi čar hăng hră pơ-ar git gai bơdjơ̆ nao bruă wai lăng mơnuih ƀôn sang Việt Nam dŏ pơ čar rơngiao. Jơnum anai pơsit mơnuih ƀôn sang Việt Nam dŏ pơ čar rơngiao jing ha bơnah ƀu dưi pơčlah đuăi mơ̆ng mơnuih ƀôn sang djŏp djuai ania, jing khul mơnuih pơtrut đĭ kyar lŏn ia ta mơn.

Tơdơi kơ 20 thun ngă tui Tơlơi pơtrun, mơnuih ƀôn sang dŏ pơ čar rơngiao hơmâo đĭ kyar kơtang wơ̆t mrô mơnuih hăng anŏ tŭ yua, mơ̆ng mrô năng ai 2,7 klăk thun 2004 jing giăm 6,5 klăk čô ƀơi rơbêh 130 boh dêh čar hăng kual lŏn, amăng anun năng ai 80% hơdip pơ hơdôm boh dêh čar pơdrong, jai hrơi hmư̆ hing tui. Pơhiăp git gai ƀơi mông jơnum, Khua dêh čar ơi Phạm Minh Chính kiăng ngă pơgiong hơdră djru, ngă gêh găl brơi mơnuih ƀôn sang dŏ pơ čar rơngiao dưi mut hrŏm dlăm hloh, hlom bom amăng tơlơi bơwih ƀong huă - mơnuih mơnam, pơtrut tơlơi rơgơi, pơtruh nao rai hăng pơkra glông mrô djă pioh khul mơnuih ƀôn sang Việt Nam pơ čar rơngiao./.