Kơ hơdră ngă bruă yôm phun amăng thun hrăm 2023-2024 Khua dêh čar kiăng ding jum, anom bruă khŏm lăng glăi abih bang, pơkra glăi, pơhrui tui hmao tlôn hơdôm tơlơi phiăn, tơlơi pơkă, ngă giong tơlơi phiăn gêh gal či pơplih phrâo bruă pơtô hăng pơjuăt, dưm dăp anih hrăm pơtô čơđai gưl prong hăng pơtô ngă nai thun 2021-2030, anăp nao thun 2050 laih anun tañ lăi pơthâo hơdră pơplông abih anih 12 tui Jơlan hơdră pơtô hăng pơjuăt thun 2018. Biă ñu, Khua dêh čar kiăng pơphun klă bruă klah čun 10 thun ngă tui Tơlơi pơsit mrô 29 mơ̆ng Ping gah kơ pơplih phrâo mơ̆ng anet truh kơ abih bang bruă pơtô hăng pơjuăt; kơsem min, ngă pơgiong, pơđĭ kyar Jơlan hơdră hrăm thun 2018 lăp djơ̆ hăng tơlơi kiăng.

Rơngiao kơ anun dong, Khua dêh čar jao kơ hơdôm ding jum, tơring čar ƀôn prong ngă hrŏm hăng Ding jum pơtô hăng pơjuăt hơmâo hơdră djru prăk kăk kơ ƀing nai pơtô pơ kual ataih asuek; tuh pơ alin man pơdong anih anom, sang hră, biă ñu lĕ glông internet ƀơi hơdôm kual mơnuih ƀôn sang djuai ƀiă, kual čư̆ siăng, bul pơtâo plao ia rơsĭ. Khua dêh čar ơi Phạm Minh Chính ăt kiăng rim čô čơđai sang hră anet prong gir hloh dong, hrăm hră hăng pơtŏp kơjăp tơlơi hrăm; thâo pơmin mă pô, pơčeh phrâo hloh dong amăng bruă pơtô hăng pơjuăt hrăm hră.

“Thun hrăm phrâo 2023-2024, Khua dêh čar bơni hơ-ơč kơ ƀing khua mua mơnuih wai lăng, ƀing nai pơtô pơtrut tui pran jua khăp kơ lŏn ia, gơgrong bruă hăng abih pran jua hloh hăng bruă mă, pơsir hĭ djŏp tơlơi tơnap, gir pơplih phrâo mơ̆ng bruă anet truh kơ abih bang bruă pơtô hăng pơjuăt, djơ̆ hăng tơlơi kiăng mơ̆ng Ping gah, Kơnuk kơna hăng Mơnuih ƀôn sang, gum pơgôp amăng bruă đĭ kyar pơdrong sah mơ̆ng lŏn ia”.