Mơmot lơ 24/11, ƀơi plơi Gru grua - Tuai hyu ngui djŏp djuai ania Việt Nam, Khua dêh čar ơi Phạm Minh Chính pơhmư̆ mông jơnum “Gum pơgôp djŏp djuai ania - Gơnam yôm gru đưm Việt Nam” thun 2025 hăng akŏ bruă “Gum gum ha pran - Anăp nao kual Tong Krah” laih anun jak iâu hơdôm anom mơdrô, mơnuih ƀôn sang gum djru mơnuih ƀôn sang kual Tong Krah - Dap Kơdư pơsir hĭ tơlơi truh ia dăo. Jơlan hơdră pơphun hăng tơlơi pơhing pơdah pơƀuh tơlơi răm rai kơtang yua ia dăo ngă. Khua dêh čar iâu pơthưr djŏp khul grup anom bruă gum hrŏm gir run, găn rơgao tơlơi tơnap, tơnap tap glêh glar ăt nao hrŏm, đăo kơnang pran gum pơgôp djŏp djuai ania amra djru lŏn ia ta dưi găn rơgao tơlơi tơnap, tơlơi lông lăng, pơtrut kiăng đĭ kyar hơđong kjăp. Ƀơi mông jơnum, hodôm khul grup, anom mơdrô hơmâo pơčruh 540 klai prăk djru ba mơnuih ƀôn sang bưp tơlơi truh răm ƀăm yua hơjan ia dăo ngă.

Tlam lơ 24/11, ƀơi sang bruă kơnuk kơna, Khua dêh čar ơi Phạm Minh Chính hrŏm hăng khua mua amăng kơnuk kơna laih anun khul mơnuih mă bruă amăng anom bruă kơnuk kơna pơčruh prăk pioh djru mơnuih ƀôn sang kual Tong krah răm ƀăm yua kơthel ngă hăng pran jua kiăng “Pơdjru ba tơdruă, tơlơi khăp pap”, rĭm čô khua mua, mơnuih apăn bruă, mơnuih mă bruă apah pơčruh boh ƀiă sa hrơi rơnoh prăk blan. Khua dêh čar pơtrun hiăp djop sang bruă pơdjơ̆ hrŏm tañ ngă giong hră pơtrun kơ bruă mă hăng hơdră pơsir phun pioh rŭ glăi anŏ răm ƀăm yua ia ling dăo ngă, tañ pơhơđong tơlơi hơdip mơda mơnuih ƀôn sang laih anun rŭ glăi tơlơi bơwih ƀong huă sĭ mơdrô. Hrŏm hăng anun, git gai pơtrut kơtang ngă tui djop jơlan hơdră pơđĭ kyar bơwih ƀong huă hrŏm hăng bruă ăt sem lăng rơnoh prăk trun nua, gơnam sĭ mơdrô đĭ amăng hơdôm blan rơnuč thun, kiăng pơhlom brơi klă tơlơi hơdip mơda mơnuih mơnam hăng pơgang tơlơi hơđong kơ abih bang.