Jơnum tơlơi bơwih ƀong huă ƀôn prong Hồ Chí Minh thun 2024 mơ̆ng lơ 24-27/9, kiăng pơtrut hơdră pơblih bruă tuh tia pơkra ming mơ̆ng ƀôn prong Hồ Chí Minh. Jơnum lơ̆m mơguah lơ 25/9, hơmâo hmư̆ lăi pơthâo kơ Bruă mă pơblih tuh tia pơkra ming ƀudah pơblih yua phrâo măi mok ƀơi ƀôn prong Hồ Chí Minh, lơ̆m bruă pơtruh nao rai amăng kual, tơring tơrang, mut phung jar kmar hăng anăp ba yua boh thâo ia rơgơi phrâo amăng anun pơtong glăi bruă pơđĭ kyar hăng pơblih yua măi mok, tuh tia pơkra ming mơ̆ng ƀôn prong Hồ Chí Minh.

Či tlam, jơnum tơña lăi glăi jơlan hơdră kơnuk kơna plah wah Khua dêh čar, khua mua ding jum, anom bruă ƀơi gơnong dlông, khua jơnum min mơnuih ƀôn sang ƀôn prong HCM, khua mua hơdôm tơring čar, ƀôn prong amăng Việt Nam laih anun ƀing tuai jak nao jơnum, djop group anom bruă sĭ mơdrô pơprong amăng dêh čar hăng jar kmar. Tal bưp tơña lăi glăi anai pơtum nao anăp mă bruă, jơlan hơdră bơwih ƀong huă mơ̆ng Việt Nam amăng rơnuk phrâo pơ anăp adih, biă mă ñu amăng bruă pơblih yua ia rơgơi măi mok.