Ƀơi mông mă bruă, Khua dêh čar ơi Phạm Minh Chính lăi pơtong, anŏ kiăng pơđĭ kyar kơ anom bruă Gru grua Pơrơguăt drơi jăn hăng Tuai čuă ngui prong biă mă, boh nik ñu khom pok pơhai ngă tui Hră pơtrun jơnum ruah khua ping gah dêh čar tal XIV, pơdjơ̆ nao gah bruă wai lăng gru grua; pok pơhai Hră pơtrun 80 mơ̆ng Ding jum kơđi čar; Jơlan hơdră či ngă tui Hră pơtrun mrô 80; Jơlan hơdră ngă tui tơhnal pơkă mơ̆ng dêh čar gah bruă gru grua, akŏ pơdong bruă ngă pioh pơtrut pơđĭ kyar tuh tia pơkra ming gah gru grua, ngă mơak pran jua.

Khua dêh čar pơtrun hiăp kơ Ding jum Gru grua Pơrơguăt drơi jăn hăng Tuai čuă ngui sem glăi, jŭ yap glăi djop mơta tơlơi pơtrun, jơlan hơdră amăng Hră pơtrun mơ̆ng ping gah dêh čar tal XIV, Hră pơtrun mrô 80 mơ̆ng Ding jum kơđi čar, pơtum ĕp lăng anŏ dŏ ngă gun aka ƀu hruaih, kơđông hơgĕt lơ̆m pok pơhai amăng bruă ngă tui sit nik gah gru grua kiăng tañ pơsir hĭ hăng ba pơdưm čih pơmut amăng Hră pơtrun hrŏm mơ̆ng sang bruă khua pơ ala mơnuih ƀôn sang dêh čar.