Tơdơi kơ hmư̆ tơlơi pơgôp hiăp, đĭ pơhiăp amăng mông mă bruă Khua dêh čar ơi Phạm Minh Chính pơpŭ bơni hơdôm tơlơi gir run hăng lăng yôm hơdôm boh than mơ̆ Ping gah, gong gai hăng mơnuih ƀon sang Trà Vinh dưi ngă amăng pơđĭ kyar bơwih ƀong huă-mơnuih mơnam amăng thun blan laih rơgao, hơmâo pơgôp amăng pơđĭ kyar hrŏm amăng đơ đam dêh čar.

Kơ jơlan gah pơđĭ kyar pơ anăp Khua dêh čar lăi rơđah, tơring čar kiăng ngă tui tŭ yua hơdră bruă akŏ phun kiăng hrưn đĭ pơplih phrâo, hơđong kjăp Trà Vinh hluai tui hơdôm bruă phun hơmâo: ngă hmua mă yua boh thâo phrâo hăng tơlơi pơmĭn ngă hmua pơhrui glăi lu hloh; bơwih ƀong amăng kual ia rơsĭ lĕ anih pơtrut; tuh tia pơkra pơjing đing nao pơkra gơnam đang hmua, mơnuih mă bruă thâo rơgơi; anih anom, jơlan glông pơhlôm tuh pơ alin ha amăng plĕ, pơplih phrâo.