VOV4.Jarai-Lơ 25/9, Khua dêh čar ơi Phạm Minh Chính hơmâo ngă bruă hăng Khua mua git gai ping gah tơring čar Yên Bái. Khua dêh čar lăng yôm boh tơhnal mơ̆ Ping gah, gong gai kơnuk kơna hăng mơnuih ƀôn sang tơring čar Yên Bái dưi ngă laih thun blan rơgao. Khua dêh čar lăi pơtong, jing kual lŏn hơmâo lu gru grua thâo thăi hăng ngă hơkrŭ, laih anun lu tơlơi gêh găl amăng bruă pơđĭ kyar, Yên Bái hơmâo djop gơnam pơtrut pơđĭ kyar hmar hăng hơđong kjăp; jing sa boh tơring čar pơđĭ kyar hloh amăng thun 2025.

Khua dêh čar ăt pơtă pơtăn khom đing nao bruă pơđĭ kyar bơwih ƀong huă; gru grua mơnuih mơnam hăng pơgang ayuh hyiăng anih dŏ jum dar lir hơbit hăng bruă pơgang dêh čar, pơhlôm rơnuk rơnua; pơđĭ kyar bơwih ƀong huă khom ngă bơkơnar bruă mơnuih mơnam; pơgang anŏ rơgoh hơdjă anih dŏ jum dar. Lơ̆m pơđĭ kyar khom lăng nao anŏ hơmâo gêh găl sit nik; kơtưn amăng bruă pơpha dăp bruă, pơdah rai tơlơi gơgrong glăm ba sa čô mơnuih apăn akŏ nao hrom hăng hăng bruă pel ĕp, krăo lăng tong ten.

Nay Jek-Siu H’Mai: Pơblang