Amăng mông jơnum, ƀing khua mua lăng amăng dua blan akŏ thun 2026, Điện Biên hơmâo sa, dua tơlơi dưi prong, lu bruă hơmâo pơplih, ngă atur brơi hơnong pơkă pơđĭ kyar amăng ha thun. Đĭ pơhiăp pơđut mông mă bruă, Khua dêh čar rơkâo tơring čar pok pơhai khut khăt, ha amăng plĕ hơdôm hơdră bruă, gir run dưi pơđĭ kyar bơwih ƀong huă mơng 11% pơ glông amăng thun 2026. Lơm anun, tơring čar kiăng đing nao mă yua klă hơdôm sang măi drai ia apui lơtrik, pơtrut pơđĭ kyar yua boh thâo măi mok phrâo amăng pơkra gơnam, apui lơtrik; laih dong pơtrut kơtang amăng pơplih ngă hmua tui jơlan gah pla gơnam sĭ mơdrô, pơjing tơhnal pơkă, hơdră bruă djru mơnuih ngă hmua pơplih phun pla, pơđĭ kyar phun makka, kơphê hăng hơdôm gơnam pla phun.

Mơmŏt hrơi anai mơn, nao jơnum ngui bơyan bơnga Ban hăng anăn “Bơnga Ban-Pran hrưn đĭ mơng Điện Biên”, Khua dêh čar čang rơmang ƀon lan tŏ tui pran gum pơgôp, djă pioh hăng ngă lar hyu gru grua, pơjing tơlơi gal mơng ayuh hyiăng jing anŏ pơtrut pơđĭ kyar hơđong kjăp brơi kơ kual Yŭ kơdư.