Tơdơi kơ kĭ tơlơi pơkôl Geneve (7/1954), lŏn ia ta ăt dŏ pơčlah, Ding jum kơđi čar pơsit akŏ pơjing grup mă bruă gah ling tơhan hăng bruă jao pok jơlan djru nao rai kơplah wah kual Kơdư hăng dơnung. Lơ 19/5/1959 lĕ hrơi mông yôm phăn amăng bruă pok jơlan Trường Sơn-Jơlan Hồ Chí Minh hăng ruah anai lĕ hrơi gru grua mơng Ling tơhan Trường Sơn sông kơtang. Kiăng ba glăi tơlơi hing ang Trường Sơn sông kơtang, hơdôm rơbăn čô mơnuih apăn bruă, Ling tơhan, hlăk ai djru blah wang, mơnuih ƀôn sang hơmâo tuh rơyuh pran jua, hăng giăm 3 rơbăn čô tơhan rơka rơkač hăng djơ̆ jrao hret.

Đĭ pơhiăp ƀơi anai, Khua dêh čar ơi Phạm Minh Chính lăng yôm hăng pơdah pran pơpŭ bơni hơdôm tơlơi gum pơgôp, tuh rơyuh pran jua mơng djop rơnuk ling tơhan Trường Sơn. Khua dêh čar brơi thâo, tơdơi kơ lŏn ia rơngai, Ling tơhan Trường Sơn hơmâo plih hơdai nao djru bơwih ƀong huă, rŭ pơdong glăi anŏ răm rai tơdơi kơ blah wang. Binh đoàn 12 hơmâo akŏ pơjing kiăng tŏ tui ling tơhan Trường Sơn. Khua dêh čar hok mơ-ak biă mă lơm ƀuh Binh đoàn 12-Kông ti man pơdong Trường Sơn glăk prong kơtang, hơmâo lu tơlơi dưi amăng bruă kơđi čar; tŏ tui pơsit tong kơdrưh ang, tơlơi đăo gơnang, anăn apăn Trường Sơn, pơgôp amăng pơđĭ kyar lŏn ia.