Mơguah lơ 8/11, rơdêh por pơgiăng Khua dêh čar ơi Phạm Minh Chính ba jơlan hlâo grup khua mua pơprong Việt Nam nao jơnum khua mua ASEAN tal 40, 41, djop mông jơnum khua mua pơkŏn pơdjơ̆ nao hăng čuă jơmư sit nik dêh čar Kur tui hăng tơlơi jak iâu mơ̆ng Khua dêh čar Kur, ơi Samdech Techo Hnun Sen. Anai lĕ, tal nao čuă dêh čar Kur blung a mơ̆ng Khua dêh čar ta ơi Phạm Minh Chính dơ̆ng mơ̆ng đĭ ngă khua dêh čar, ăt kah hăng tal blung mơ̆ng sa čô khua prong mơ̆ng Việt Nam nao pơ dêh čar Kur amăng Thun hơdor glăi ngă giăng mah Việt Nam-Kur 2022.

Ƀơi mông jơnum khua mua ASEAN, Khua dêh čar ơi Phạm Minh Chính amra hơmâo tơlơi đĭ pơhiăp yôm, kah pơpha nao rai tơlơi kiăng ăt kah hăng tơlơi rơkâo mơ̆ng Việt Nam kiăng ngă kjăp tơlơi gum pơgôp, tŭ ư sa hnong hăng tơlơi gơgrong phun mơ̆ng ASEAN, pơtrut ngă hrom gum pơgôp amăng kual, hơdôm bruă dua bơnah đing nao, kơtưn tơlơi ngă giăng mah kơplah wah ASEAN hăng hơdôm bơnah, pơčrông sai hơdôm tơlơi jar kmar hăng amăng kual laih anun tơlơi mơak klă rơnuk rơnua.